Mama-ginekoloji kabinet müasir təbabətin tələblərinə cavab verə biləcək səviyyədə fəaliyyət göstərir. Həkim-ginekoloqlarımız ali kateqoriyalı mütəxəssislərdir. Onların köməyi ilə pasientlərə hərtərəfli peşəkar tibbi yardım göstərilir və məsləhətlər verilir.

Həkimlərin fəaliyyəti iki əsas tərkib hissəsindən ibarətdir : mamalıq və ginekologiya.

Kabinetdə hamiləliyi planlaşdırılmış qadınların müayinə və doğuşa hazırlığı aparılır, hamiləlik dövründə pasientlərə nəzarət edilir ki, buraya müntəzəm laborator analizlərin verilməsi, digər mütəxəssislərin baxışı, dopplerometriya ilə USM müayinəsi daxildir. Hamilələrə doğuşa qədər məzuniyyət, mübadilə kartı və digər lazımi sənədlər verilir. Doğuşdan sonra qadınlar baxış, bərpa tədbirlərinin həyata keçirilməsi və kontrasepsiyanın seçilməsi üçün təkrar öz həkimlərinə müraciət edirlər.

Bundan əlavə müxtəlif ginekoloji xəstəliklərin (məsələn, uşaqlıq miomaları, endometrioz, yumurtalıqların kistası, endometriya və uşaqlıq boynunun hiperplaziyası və polipləri, uşaqlıq boynu patologiyaları, müxtəlif etiologiyalı uşaqlıq qanaxmaları, qadın cinsiyyət orqanlarının iltihabi xəstəlikləri, sonsuzluq, cinsi yolla ötürülən infeksiyalar) diaqnostika və müalicəsi aparılır. Ambulator qəbul zamanı pasientlər hormonal kontrasepsiya problemləri, menstruasiyaönü və klimakretik sindromlar, həmçinin əvəzləyici hormonoterapiya da daxil olmaqla istənilən ginekoloji patologiya haqqında məsləhətlər alırlar.

Əgər qadının cərrahi müdaxiləyə ehtiyacı varsa və bunun həyata keçirilməsinə əks göstərişlər yoxdursa, klinikanın əməliyyat şöbəsində uşaqlıq və uşaqlıq boynu kanalının diaqnostik qaşınması, polipektomiya kimi əməliyyatlar aparılır. Əməliyyatdan sonra qadınlar stasionara yerləşdirilir.

Burada aşağıdakı müayinələr aparılır:

  • Laborator diaqnostika: kliniki və biokimyəvi müayinələr, hormonların müayinəsi, immunoloji analizlər, ginekoloji yaxmaların götürülməsi, cinsi yolla ötürülən, o cümlədən virus infeksiyalarının aşkarlanması.
  • İnstrumental diaqnostika: kolposkopiya – Leisegang firmasının yeni müasir videokolposkopu ilə aparılır. Bu müayinə həkimə uşaqlıq boynu və uşaqlıq yolunun dəfələrlə böyüdülmüş şəklini görməyə, həmin nahiyyələrin xərçəng və xərçəngönü dəyişikliklərini aşkar etməyə imkan verir. Kolposkopiya uşaqlıq boynu eroziyası, leykoplakiya, ektopiya, uşaqlıq boynunun displaziya və xərçənginin diaqnostikasında əvəzolunmaz müayinə metodudur.
  • Ultrasəs müayinəsi (USM), kompüter tomoqrafiya (KT), maqnit-rezonans tomoqrafiya (MRT)

Kabinetdə aparılan manipulyasiya və əməliyyatlar: uşaqlıqdaxili spiralların qoyulması və xaric edilməsi. Təcili, təxirəsalınmaz yardıma ehtiyac olduqda xəstələr XMSK-nın stasionar şöbəsinə qəbul edilir.